അപസ്മാരം / ശ്രീകുമാർ കരിയാട്

അന്നും കടലിന്നടിയിലെ സ്രാവുകള്‍

അന്തരീക്ഷത്തില്‍ നിരന്നു

“കിംഗ് ഫിഷര്‍ പൊന്മ’‘യെന്നര്‍ത്ഥം പറയുന്ന

കുഞ്ഞുങ്ങള്‍ തുള്ളിക്കളിച്ചു

പൊന്തുംജലത്തില്‍ കുളിക്കുവാന്‍ പേടിക്കും

പെണ്ണ് ജനാലക്കല്‍ വന്നു

പിന്നില്‍നിന്നാരുമറിയാതൊരാള്‍ മുടി-

പിന്നിയതോര്‍ത്തവള്‍ നിന്നു

ചെങ്കഴുകന്റെ ചിറകായിയാകാശ-

മന്തമില്ലാതെ കിടന്നു

എങ്കിലും കണ്ണീരുമാത്രം കുടിച്ചവ-

ളുമ്മയിലെല്ലാം മറന്നു

മുങ്ങും മുറിയിലന്നേഴാംനിലയിലെ-

ച്ചന്ദ്രനെ രാഹു കവര്‍ന്നു

വന്‍ തിരമാലച്ചുഴിയിലക്കന്യക -

തന്‍ ജഡം മീനുകള്‍ തിന്നു

അന്നും കടലിന്നടിയിലെ സ്രാവുകള്‍

അന്തരീക്ഷത്തില്‍ നിരന്നു

“കിംഗ് ഫിഷര്‍ പൊന്മ’‘യെന്നര്‍ത്ഥം പറയുന്ന

കുഞ്ഞുങ്ങളാര്‍ത്തുകരഞ്ഞു

............................................

അപസ്മാരം / ശ്രീകുമാർ കരിയാട്

 (മേഘപഠനങ്ങള്‍ -സമാഹാരം--2002)

Sreekumar Kariyad